Соғлиқни сақлаш вазири глобал муаммо ечимини айтди

Соғлиқни сақлаш вазирлиги томонидан ташкил этилган бу галги республика оммавий тадбири “Саломатлик сари қадам куни”, дея номланди. 

Аҳолининг соғлом турмуш тарзига амал қилишини қўллаб-қувватлаш ҳамда жисмоний фаолликка чорлашни мақсад қилган мазкур тадбир юртимиздаги барча туман ва шаҳарлардаги истироҳат боғларида ўтказилди. Мусобақаларда ҳудудда жойлашган барча тиббиёт муассасалари, маҳалла фуқаролар йиғинлари, корхона ва ташкилотлардан келган жамоалар иштирок этишди. Ушбу куннинг байрамона кайфиятда ўтишида тиббиёт соҳасининг кўзга кўринган, тажрибали шифокор олимлари билан биргаликда тегишли ҳокимликларнинг маданият бўлимлари, санъат саройлари вакиллари, ўша ҳудудда яшовчи фан, маданият, санъат арбоблари, спорт намоёндалари, халқ орасида обрў-эътиборга эга фуқаролар ҳам муносиб ҳисса қўшишди.

Жумладан, пойтахтимиздаги Заҳриддин Муҳаммад Бобур номидаги марказий экобоғда жам бўлган Соғлиқни сақлаш вазирлиги марказий аппарати ҳамда бошқа ҳамкор давлат ва жамоат ташкилотлари вакилларининг оммавий равишда 4 километрга юриши билан “Саломатлик сари қадам куни”га старт берилди. Шунингдек, ҳар бир муассаса жамоалари шахмат, шашка, югуриш, эстафета, арқонда сакраш, бадминтон, стол тенниси, спорт юриши, тўсиқлардан ўтиш эстафетаси ҳамда халқа айлантириш спорт турлари бўйича ўзаро беллашди. Ушбу спорт турларидаги мусобақаларда қатнашиш, аввало, саломатлик гарови. Шунингдек, мантиқан фикрлаш, хотира ва диққатни чархлайди, бўғимларнинг ҳаракатчанлиги яхшиланиб, куч, тезлик, чидамлилик ва қобилиятни тарбиялайди. Бундан ташқари, юқори елка камари, оёқ-қўллар мушаклари иши фаоллашиб, организмнинг ҳамма аъзолари ва тизимлари иши рағбатлантирилади.

– Бугунги кунда инсонларда камҳаракатлилик оқибатида юзага келаётган турли касалликлар дунё миқёсида глобал муаммога айланган. Камҳаракатли ҳаёт тарзи шу тариқа давом этса, келгусида беморлар тиббиёт тизимидаги барча стационар шифохоналарга ҳам сиғмай қолиши мумкин. Бу нафақат жамият учун, балки ҳар бир шахснинг ўзи учун ҳам жиддий ташвишдир, – дейди Соғлиқни сақлаш вазири Алишер Шадманов. – Шу боис соғлом турмуш тарзига амал қилиш юқоридаги каби глобал муаммоларга ечим бўлади. Президентимиз тиббиёт ходимлари олдига касалликни эмас, аввало, унинг профилактикасига эътибор қаратишни муҳим вазифа сифатида қўяётгани ҳам бежиз эмас. Шунинг учун вазирлигимиз ушбу йўналишдаги тарғибот ишларига алоҳида эътибор қаратиб, бу борада оммавий тадбирларни мунтазам ўтказиб келмоқда. Бу эса аҳолининг жисмоний фаолликка бўлган қизиқишини ошириб, ўз саломатлигига эътиборли бўлишида муҳим ўрин тутмоқда. Бугунги тадбирни ҳам бежизга юриш билан бошламадик. Мунтазам юриш қон босимини меъёрда ушлайди, хотиржамлик бахш этади. Масалан, тоза ҳавода, ҳатто, ёмғирли кунда ҳам атиги 25 дақиқа сайр қилсангиз, ўзингизни бахтли ҳис қиласиз, тушкунликни енгасиз.

***

Ўзбекистон Республикаси Президентининг 2018 йил 18 декабрдаги “Юқумли бўлмаган касалликлар профилактикасини, соғлом турмуш тарзини қўллаб-қувватлаш ва аҳолининг жисмоний фаоллиги даражасини ошириш чора-тадбирлари тўғрисида”ги ПҚ-4063-сонли қарори га асосан Бухоро вилоятида ҳам “Саломатлик сари қадам куни” тадбирлари юқори савияда ташкил этилди. Тадбирларда шахмат-шашка турнири, 30 метрга югуриш, эстафета, арқонда сакраш, бадминтон, стол тенниси, икки километрга спортча юриш марафони, халқа айлантириш ҳамда тўсиқлардан ўтиш эстафеталари уюштирилди. Аҳамиятли жиҳати шундаки, ёмғирли ҳаво бўлишига қарамай, шу кунги тадбирларда вилоят бўйича 12 минг киши иштирок  этди. “Кўҳна ва боқий Бухоро” маданий марказида ўтган марафонда Бухоро шаҳридаги тиббиёт муассасаларидан 4500 нафардан ортиқ тиббиёт ходимлари қатнашди. Соғломлаштириш тадбирлари билан бир қаторда, аҳолининг саломатлик ҳолатини баҳолаш, ноинфекцион касалликларни келтириб чиқарувчи хавфли омилларни аниқлаш ҳамда уларнинг парофилактикаси бўйича тегишли йўл-йўриқлар бериш мақсадида ҳудудларда “Саломатлик майдончалари” ташкил этилди. Бу тадбирларда мутахассислар “Соғлом турмуш тарзи асослари”, “Соғлом овқатланиш асослари”, “Жисмоний фаолликнинг инсон организмига таъсири” ҳамда “Сил касаллиги профилактикаси” мавзуларида суҳбатлар ташкил этдилар.

Соғлиқни сақлаш вазирлиги томонидан уюштирилган мазкур оммавий тадбир юртимиз бўйлаб кўтаринки руҳда ташкил этилди. Эслатиб ўтамиз, келгуси шанба, 30 март вазирлик томонидан мамлакатимиз ҳудудларида велосипедда сайр куни ўтказилади.

Бухоро вилоят ҳокимлиги соғлиқни
сақлаш бошқармаси ахборот хизмати

This entry was posted in Yangiliklar. Bookmark the permalink.